वीरगन्ज । सशस्त्र प्रहरी बल पर्साले छिमेकी मुलुक भारतबाट तस्करी गरेर भित्र्याएको प्रतिबन्धित ७ हजार ५ सय वटा कुखुराको चल्ला बरामद गरेको छ ।
सशस्त्र प्रहरी बल पर्साबाट खटिएको टोलीले आज बिहान बहुदरमाई नगरपालिका–५ डकैला चोकबाट भारतबाट अवैध रुपमा चोरी पैठारी गरी तीन वटा भारतीय नम्बर प्लेटका मोटरसाइकलमा लोड गरेर नेपाल ल्याउँदै गरेको ७५ कार्टुन अर्थात् ७ हजार ५ सय वटा ब्रोइलर कुखुराको चल्ला नियन्त्रणमा लिएको हो ।
सशस्त्र प्रहरी बल नेपाल पर्साका सूचना अधिकारी देवेन्द्रबहादुर सिंहले बरामद भएको प्रतिबन्धित कुखुराको चल्लालाई क्वारेन्टाइन कार्यालयका प्रतिनिधि, स्थानीय जनप्रतिनिधि र सञ्चारकर्मीको उपस्थितिमा नष्ट गरिएको जानकारी दिनुभयाे । चल्ला पैठारी कार्यमा प्रयोग भएका मोटरसाइकलमाथि अनुसन्धानका लागि वीरगन्ज भन्सार कार्यालयमा बुझाउने तयारी भइरहेको जनाइएको छ ।
