काठमाडौं । रसुवाको भोटेकोशीमा आएको बाढी त्रिशूली नदी हुँदै तल्लो तटीय क्षेत्रमा फैलिएको छैटौँ दिन पनि प्रभावित क्षेत्रमा खोजी कार्य रोकिएको छैन। बाढीमा बेपत्ता भएकाहरूको खोजी तथा उद्धारका लागि सुरक्षाकर्मी र उद्धार टोली परिचालन भइरहेका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सोमबार बिहान ९ बजेसम्मको विवरण सार्वजनिक गर्दै बाढीबाट ९०३ जनाको मृत्यु भएको पुष्टि भएको जनाएको छ। घटनापछि विभिन्न स्थानबाट गरी १० हजार ४५१ जनाको उद्धार गरिएको छ भने अझै ४ हजार २४७ जनाको अवस्था अज्ञात रहेको छ।
सम्पर्कविहीन हुनेमा सर्वसाधारणसँगै सुरक्षाकर्मी, सरकारी कर्मचारी, जलविद्युत् आयोजनामा कार्यरत कर्मचारी तथा पर्यटकसमेत छन्। प्राधिकरणका अनुसार नेपाली सेनाका ४५, नेपाल प्रहरीका २५ र सशस्त्र प्रहरीका १३ जना सुरक्षाकर्मी अझै सम्पर्कमा आएका छैनन्।
भन्सारतर्फ १५ जना र अध्यागमन कार्यालयका ३ जना पनि बेपत्ता छन्। जिल्लागत विवरणमा रसुवाका ८६५ र नुवाकोटका १ हजार ५५८ जना सम्पर्कविहीन रहेको प्राधिकरणले जनाएको छ। त्यस्तै, जलविद्युत् आयोजनामा कार्यरत ९३३ तथा मकवानपुरका ६५ जना पनि बेपत्ताको सूचीमा छन्।
बाढीमा परेर विदेशी नागरिकको समेत ठूलो संख्यामा सम्पर्कविहीन भएको छ। हालसम्म ५९२ जना विदेशी नागरिक, विदेशी पर्यटकसँगै रहेका १२७ नेपाली, लाङटाङ राष्ट्रिय निकुञ्जका ३ कर्मचारी र क्वारेन्टाइन कार्यालयका ३ जनाको अवस्था थाहा हुन नसकेको प्राधिकरणले जनाएको छ।
बाढी प्रभावित क्षेत्रमा बेपत्ताको खोजी, शव व्यवस्थापन तथा उद्धार कार्यलाई प्राथमिकतामा राखेर सुरक्षा निकायसहितका टोली परिचालन भइरहेका छन्।
