पटक-पटक म्याद थप्दा पनि सकिएन काम

पढ्न लाग्ने समय : मिनेट

मकवानपुरको चन्द्रागिरीदेखि काठमाडौँको थानकोटस्थित पानीघाटसम्म जोड्ने सडक स्तरीकरणको लागि तीन पटकसम्म म्याद थप्दा अहिलेसम्म ५२ प्रतिशत मात्र काम भएको छ । सडक निर्माणको काम पूरा नहुँदा स्थानीय बासिन्दाले निकै सास्ती खेप्न बाध्य भइरहेका छन् ।

थाहा नगरपालिकाको चनवनदेखि चन्द्रागिरि नगरपालिकाको पानीघाटसम्म जोड्ने गणेशमान सिंह मार्गअन्तर्गत २२.५ किलोमिटर सडकको विस्तृत परियोजना प्रतिवेदन–डिपिआरअनुसार २०७३ सालमै दुईवटा ठेक्का भएको थियो । तीमध्ये मकवानपुरतर्फको १४.२ किलोमिटर सडकको ठेक्का सम्झौताअनुसार ससाना कामबाहेक पिचको काम मात्र बाँकी रहेको भए पनि काठमाडौँतर्फको ८.३ किलोमिटर खण्डको काम अघि बढ्न नसक्दा स्थानीय जनताले सास्ती खेप्न बाध्य भइरहेका हुन् ।

चन्द्रागिरीदेखि पानीघाटसम्मको सडक स्तरोन्नतिको लागि २०७३ साउन १७ गते पीएस किराँतेश्वर जेभीसँग सम्झौता गरी कामअघि बढाइएको थियो । सुरूमा १५ महिनामा काम सम्पन्न गर्ने गरी सम्झौता भएकोमा सम्झौताको चार वर्ष पूरा हुँदा पनि सम्पन्न हुन सकेको छैन । “अहिलेसम्म तीन पटक म्याद थपिसकेका छौँ, पछिल्ला सम्झौता गएको वैशाख १५ गते सकिएको छ, अहिलेसम्म ५२ प्रतिशत काम भएको छ”, सडक विभागअन्तर्गतको चित्लाङ थानकोट सडक आयोजनाका प्रमुख वीरेन्द्र गौतमले भन्नुभयो ।

नेपाल सरकारको असार अन्तिम साता बसेको मुख्य सचिवस्तरीय बैठकले कोभिड–१९ का कारण काम गर्न समस्या भएकाले निर्माण सम्पन्न हुन नसकेका ठेक्कामा छ महिना म्याद थप्ने निर्णय गरेको छ । चन्द्रागिरी–थानकोट सडकका सरोकारवाला भने पुनः म्याद थपिए पनि काम सम्पन्न हुनेमा विश्वस्त हुन सकिरहेका छैनन् । मकवानपुरका प्रदेश सांसद कुमारी मोक्तानले भन्नुभयो, “यही सम्झौताबाट काम होलाजस्तो लाग्दैन । बरु केही समय ढिलै भए पनि यो ठेक्का सम्झौता भङ्ग गरी अर्को ठेक्काको प्रक्रियामा जानुपर्छ ।”

सडक चौडा गर्ने, काट्ने, ठाउँठाउँमा पर्खाल निर्माण गर्नेलगायत काम गर्ने गरी भएको सम्झौताबमोजिम काम सुरू गरेको पीएस किराँतेश्वर जेभीले भने आयोजना कार्यालय, स्थानीय बासिन्दा र सरोकारवालाले सहयोग नगरेको कारण निर्माण कार्यले गति लिन नसकेको गुनासो गरेको छ । उक्त कम्पनीका प्रतिनिधि सनकसिंह राईले भन्नुभयो, “सडक खन्दा निस्किएको ढुङ्गा–माटो थुपार्ने ठाउँ छैन । ढुङ्गा बेच्न पनि पाइएको छैन ।”

ढुङ्गा बिक्री गर्न वन कार्यालयकाे छुट्टै बोलपत्र आह्वान

सडक चौडा पार्ने क्रममा निस्किएको ढुङ्गा बिक्री गर्न वन कार्यालयले छुट्टै बोलपत्र आह्वान गरेको थियो । यसको ठेक्कासमेत पाएको पीएस किँरातेश्वरले ढुङ्गाकै व्यवस्थापन गर्न नसक्दा सडकको काम गर्न नसकेको बताएको छ । वन कार्यालयले बोलपत्र गरेको ढुङ्गा उठाउने कार्य सडक आयोजनाको सरोकारको विषय नभएको भन्दै सडक आयोजना कार्यालय ठेकेदारको गुनासो सुन्ने पक्षमा देखिँदैन । चन्द्रागिरी नगरपालिकाले भने ढुङ्गा सङ्कलनस्थलकै अभावका कारण सडकको काम रोकिएको हो भने त्यसमा सहयाग गर्न तयार रहेको जनाएको छ । नगरपालिकाकी उपप्रमुख लिसा नकर्मीले सडक खन्दा निस्किएको ढुङ्गा सङ्कलन गर्ने ठाउँ तुरुन्तै उपलब्ध गराइने बतानुभयो । चन्द्रागिरी नगरपालिका–४ का वडा अध्यक्ष कृष्णप्रसाद खड्गीले भन्नुभयो, “बहाना गरेर सडकको काम रोक्न पाइँदैन, खबर पाएको एक घण्टाभित्र ढुङ्गा थुपार्ने ठाउँ देखाइदिन्छौँ ।”

यसैबीच बाग्मती प्रदेशका भौतिक पूर्र्वाधार विकासमन्त्री रामेश्वर फुयाँलले सबै पक्षको साझा सहमति बनाएर नतिजामुखी काम गर्न सरोकारवालालाई आग्रह गर्नुभयो । “यो सडक सङ्घ मातहत रहेको भए पनि जनताको हितका निम्ति हामी सहजीकरण गर्न तयार छौँ”, उहाँले भन्नुभयो ।

विसं २०१८ सालदेखि २०२३ सालसम्म पाँच वर्ष लगातार श्रमदान गरेर चित्लाङका बासिन्दाले मोटर गुड्नेसम्म बनाएको चित्लाङ चन्द्रागिरी सडक २०७१ सालमा विस्तृत परियोजना प्रतिवेदन तयार गरी स्तरीकरण सुरू गरिएको थियो । डिपिआरमा रु एक अर्ब १३ करोड ३६ लाख बजेट अनुमान गरिएकोमा हालसम्म यो सडकमा रु ४५ करोड खर्च भएको सडक आयोजना कार्यालयका इञ्जिनीयर दीपक याकामीले जानकारी दिनुभयो ।