प्रविधि

काठमाडौं । हामीले नयाँ स्मार्टफोन खरिद गर्दा कति जीबी वाला र्‍याम भएको फोन खरिद गर्ने भन्ने बार पक्कै सोच्छौ । बजारमा दुई जीबी, तीन जीबी, चार जीबी वा आठ जीबी गरी अनेक भेरियन्टमा हामीले स्मार्टफोन पाउन सक्छौ ।

यसै बारे आज हामी चर्चा गर्छौ । र्‍याण्डम एक्सेस मेमोरीलाई हामी छोटकरीमा र्‍याम भनेर बुझ्दछौं । यसलाई सजिलोसँग बुझ्ने हो भने यो एक प्रकारको अस्थायी रुपमा डेटा स्टोर गर्ने मेमोरी हो ।

यसले जब हाम्रो फोनमा कुनै एप वा वेब रन हुन्छ, त्यसको डेटा यसले अस्थायी रुपमा स्टोर गरेर राख्दछ । ता कि उक्त एप्लिकेसनलाई फास्ट प्रयोग तथा एक्सेस गर्न सकियोस् ।

यदि तपाईं फोनमा एकसाथ धेरै एप्लिकेसन प्रयोग गर्नुहुन्छ र एउटा एप्लिकेसनबाट अर्कोमा फास्ट सिफ्ट हुन चाहनुहुन्छ भने यो सबै काम र्‍यामकै कारण सम्भव वा असम्भव हुन्छ । यसको अर्थ तपाईंले जसै आफ्नो स्मार्टफोनमा कुनै एप अन गर्नुहुन्छ, तत्कालै उक्त एप्लिकेसन र्‍याममा लोड हुने गर्दछ ।

यस्तो एप र्‍याममा त्यतिखेरसम्म रहन्छ, जबसम्म तपाईं उक्त एपलाई बन्द गर्नुहुन्न वा फोनलाई रिस्टार्ट गर्नुहुन्न । यसअर्थ सामान्य रुपमा बुझ्दा र्‍याममा एप्लिकेसनको डेटा अस्थायी रुपमा स्टोर हुने गर्दछ ।

यो एक प्रकारको अस्थायी स्टोरेजका लागि उपयोग हुने मेमोरी हो । स्मार्टफोनको इतिहास केलाउदा १२८ एमबी, ५१२ एमबी, एक जीबी र दुई जीबीको र्‍याम हुने गर्दथ्यो । त्यतिखेर आउने एप्लिकेसनहरु पनि निकै हलुका आकारका हुने गर्दथे ।

समय बदलिँदै गएसँगै प्रविधि पनि विकास हुँदै गए पछि र्‍यामको क्षमता बढ्दै गयो । एपहरु अपग्रेड हुँदै गए । पहिले हलुका एप हुने गर्दथे, अब त्यही ठाउँमा भारी एपहरु आउन थालेका छन् ।

आजकलका एपहरु ५० एमबी, सय एमबी, ५०० एमबीका हुने गर्दछन् । अझ गेमहरु हेर्नुभयो भने त झन् एक जीबी, डेढ जीबी र दुई जीबी आकारका हुने गर्दछन् ।

हामीले स्मार्टफोन प्रयोग गर्दा कमसेकम चार जीबी र्‍याम त हुन जरुरी छ । स्मार्टफोन उद्योगमा चार जीबी र्‍याम एउटा स्ट्याण्डर्डको रुपमा स्थापित भएको छ ।

त्यसैले स्मार्टफोन निर्माता कम्पनीहरु पनि कम्तिमा चार जीबी र्‍याम भएका स्मार्टफोनहरु ल्याउनेतर्फ जोड दिइरहेका छन् । ता कि एपहरु सहजै ओपन गर्न सकियोस् ।

प्रयोगकर्ताले सहजै एकसाथ फोनमा दुई वा दुई भन्दा बढी एपहरु प्रयोग गर्न सकुन् र गेमिङका लागि प्रयोग गर्न चाहन्छन् भने सामान्य रुपमा त्यसलाई पनि खेल्न सकुन् । यसबाट सामान्य प्रयोगकर्ताको अनुभव नराम्रो नहोस् भन्नेतर्फ स्मार्टफोन निर्माता कम्पनीको ध्यान गइरहेको हुन्छ ।

यदि तपाईं स्मार्टफोनमा फेसबुक, युट्युव, ट्वीटर, ह्वाट्सएप, इन्स्टाग्राम र टिकटक जस्ता एप्लिकेसनका साथै सामान्य किसिमका गेमिङ एप प्रयोग गर्न चाहुनुहुन्छ भने आजको समयमा कम्तिमा चार जीबी र्‍याम भएको स्मार्टफोन खरिद गर्नुहोस् । तर तपाईं सामान्य गेमिङभन्दा माथि अर्थात हेभी गेमिङ गर्न चाहनुहुन्छ अथवा भनौं तपाईंलाई गेमिङको निकै शौख छ र एक जीबीरडेढ जीबी साइजका गेम खेल्नुहुन्छ भने फोनमा कमसे कम छ जीबीको र्‍याम हुन जरुरी छ ।

यदि तपाईं त्यसभन्दा पनि झन् हार्डकोर गेमिङमा रुची राख्नुहुन्छ भने तपाईंको रोजाई गेमिङ स्मार्टफोन नै हो । त्यस्तो अवस्थामा आठ जीबी र्‍याम भएको स्मार्टफोन खरिद गर्ने कोसिस गर्नुहोस् ।